|
يئنه مكتب يوللاري آچيليب يئنه كيف كيتاب، دفتر، قلم لر آلينيب. منيم باجيم بيرينجي صينيفه گئدير. ايلك مكتب گونودور. چوخ سئوينجك دير. مكتب پالتارلاريني گئييب كيف گوتوروب، منيم اليمدن ياپيشيب يولا دوشوروك.
يولدا آتيلا آتيلا، اويناخلاياركن گويرچين كيمي اوچوب سئوينج دن گوزلري ايشيلداييردي. اليني اليمه توتوب دئديم: اولدوز، اوخولدا معليمه نين سوزوندن چيخما،هئچ كيمله سؤزلشمه، اوشاقلارلا اؤيناياندا اوجالاردان آتيلما... اؤ يئنه اؤيناخلاييردي. هئچ اينانميرام مني دويماغيني، آما تئز تئز دئييردي ياخجي قاداش جان ياخجي، ياخجي و بارماخلاريمي الينده سئخئردي. من سئوينركن كدرلنيرديم. اؤ آخي چؤخ كيچيك دير، قلبينه ده ين اؤلماسين آلله . بوگون ايلك گوندور قلبينه ديسن داها بو عشقيله مكتبه گئتمز.
مكتب گؤزه گؤرسنير. آتديم لاري بير آز ياواشلانير،اؤ گولومسييه ن اوزونو منه دوتوب دئيير قاداش بورا مكتبيميزدير؟
اوغوردونو قئيرتيب دئييره م يؤخ بورا كوچه دير! بيرده ن دورور، منه باخير و اؤ گؤزه ل گولومسه ين ياشيل گؤزلريني گؤزلريمه تيكيب دئيير آآآآ.. قادااااش.. بورا يؤخكييي،اؤرا!
من گولوره م اؤدا گولور.
مكتبين قاپيسي آچيقدير، گول چيچك له بزه نيب. ايچري بالاجا اوشاقلارلا دولودور. بير اوشاق شئيخميلا بيزه دييب كوچه يه قاچئير آناسي داليجا قئيشقئيرير آيئتيم دور نه! هارا قاچيرسان آنان اؤلسون!
اولدوز گولور و دئيير قاداش بو هارا قاشدي؟؟ دئييره م: بيلميره م، پيس قئزدي دا! آدام مكتب ده ن قاچماز!
اييليب ديزه چؤكوب آنليني اؤپوره م اؤدا همئشه كي كيمي چنه مي اؤپور، دئيير قاداش اؤردا نه يازيب؟
بارماغيلا دووارا وورولان اعلاني گؤسترير، اؤخويورام: ورود نوگلان عزيز را به صاحت مقدس دبستان گرامي ميداريم.
اوزونه باخيرام، هويوخوب. دئيير قاداش يا نمنه؟؟! دئييره م ياني كي اؤخولا خؤش گليبسن!
اؤ گولور من آه چكيره م. دئيير قاداش خودافيظ،؛ دئييره م من گلمه ييم؟ دئيير يؤخ اوردا هامي قئيزدي گلسن اوتانارلار!
گولوره م. اوغوردونو قئيرتيب آنليني اؤپوب دئييره م: ياخشي دا بيليره م سن خانيم اؤلوبسان ، من گلميره م آما بوردان باخيرام گئت دور صفه. باغريما باسيب بيرده اؤپوره م، بيلميره م نييه اوره گيم ايسته مير اونو بيراخيم...
او گئديب صفه گيرير.
آخشام دير،اولدوزون گتيرمه گينه گئديره م. زنگ لري چالينير، اوشاقلار كوچه يه تؤكولور> منيم گؤزلريم اولدوزو آختارير.
ياواش ياواش كيفيني يئرده سورويه سورويه اوشاقلارين ايچينده ن منه ساري گلير. قاباغا يئريييره م قيزارميش اوغوردلاري؛سوزگون باخيشلاري اوره گيمه سيركه لمه سالير؛ باغريما باسيرام؛ كيفيني آليرام. دئيير: قاداش.. واؤكوتمه يله آغلايير منيمده گؤزلريم دؤلوب دئييره م اولدوز نه باش وئريب؟قاداني آليم گل قاداشا گؤروم. قوجاغيما آليب آياغا دورورام، يؤلا دوشوروك. او هله آغلايير؛ منيم اوره گيم دؤزمور دئييره م: اولدوز گوزليم آغلاسان قاداش دا آغلارها، آغلاما داي بس ائله!
قؤللاريني بؤينوما ساريب دئيير : من بيرده اورا گئتمه يه جم!
دئييره م هارا؟ اوخولو دئييرسن؟ نييه آخي؟
گؤز ياشلاري كؤينه گيمده ن كئچيب چيگنيمي ايسلادير.آياخ ساخلاييرام؛اولدوزو يئره قؤيوب آرخاسيندا ديزه چوكوب، گؤزلريني سيليره م. دئيير: من بو كيتابلاري اوخوماياجام! من اونلار دانيشان ديلي باجارميرام! سئوميره م! معليمه نه دانيشدي هئچ نه بيلمه ديم،آنجاق آديمي اؤخوياندا بيلديم! قاداش من داريخيرام مني آپارآيري اؤخولا!
هيرسلييه م ، چؤخ هيرسلي؛ همده كدرلي؛ دئييره م:گؤزه ل باجي آخي سن گره ك اؤيرنه سن دا،سن فارس جا كيتاب اؤخوماليسان، فارسي اؤيرنملي سن، من اؤزوم سنه اؤيرده جم؛ جان باجيم آغلاما.
اؤ گؤز ياشيني آخيرديب تيتره ين سسيني اينجه بؤغازيندان چيخارير:قاداش.. تورك مكتبي يؤخدور؟؟؟
من آه چكيب اولدوزو باغريما باسيب آياغا دورورام. يؤلا دوشوروك؛ بير اوشاق داليميزجا قئيشقئرير: كيف قالدي، كيفينيز قالدي!
اولدوز اوزونو اوزومه داياييب قولاغيمين ديبينده دئيير: قؤي قالسين ،ايسته ميره م!
اؤغوردونو اؤپوب دئييره م: هه، ايستميريك، قؤي قالسين!
|
