بير نامه يازديم باد صبا ياره يتيرسين
شرح غمي اول بوت خونخواره يتيرسين
هجران المي سالدي آياقدان من زاري
داروي وصالين من بيچاره يتيرسين
صبريم كسيليب، يار منيم جانيمي آلسين
يا شاد ائله سين وصل ايله ديلداره يئتيرسين
دونياده و عوقباده گوروم مطلبه يتسين
هر كس مني اول يار وفاداره يتيرسين
بير يول ورين اي محنت هجران كي پياميم
تا باد صبا اول گول گولزاره يتيرسين
يوز حسرتيله بو ديل هجرانه گيرفتار
عزم ائتدي اوزون اول گول بي خاره يتيرسين
گل تاري اوچون بونجا سيتم ايله مه اظهار
قوي ياره اوزون بو ديل آواره يتيرسين
بي كس لييمه رحم ائيله سين خاليق بي چون
حيران او شهبازه ديگرباره يتيرسين

شعر:حئيران خانوم